KÖLSCH VERZÄLLCHEN Un se künnen et doch MARITA DOHMEN Leev Lückcher, die ehr he dä Tex lese wollt. Sidd ehr secher, dat ehr dat och künnt? Schleeßlich hät ene Kumedemächer, dä en Kölle jederein kennt, jesaat, dat de Kölsche kei Kölsch mih verstündte. Deswäje weed et op singer Bühn kei Kölsch mih jevve. Wat för en Blamasch för en Bühn, die sich en ´Kölner Volkbühn´ nennt. Die ärm kölsche Sproch. Allt widder einer, dä ehr der Rögge driht. No kann ich jo verstonn, wann einer met singem Berof nit bloß Jeld verdeene well, nä, och muss. Ävver, saht ens, muss hä deswäje ander Lück, die die Sproch nit bloß verstonn,nä, och spreche künne, un vör allem all die, die se och jän höre, su eifach avqualifiziere? Ich well im jo jän jläuve, dat hä Kölsch versteit un it och lese kann. Dat bedück ävver nit en einem Odemzoch, dat hä och kölsche Stöckelcher schrieve künnt. Kann hä dat? Dobei jeit et jo nit bloß dröm, einzele Wööt op Kölsch ze üvversetze, he heiß em Besondere, de kölsche Usdröck parat ze hann. Hät hä die? Kennt hä sich wirklich en de kölsche Sprochwendunge su jot us, un kann hä de kölsche Eijenaat su jot präsenteere, dat hä si Publikum domet en der Bann trecke kann? Ich weiß et nit! Ich vermode ävver ens, dat der wohre Jrund för sing Kapitulation vör der Kölsche Sproch dodren ze söhke ess, dat hä die Lück, alsu de räächte Kumedemächer, die de kölsche Sproch noch müjjelichs fählerfrei usspreche künne, do eifach nit för hät. Wat nötz et do, wann hä et kann, die andere ävver nit. No sin jode Schauspiller, die och Kölsch künne, secher rar jesiet, dat et ävver sujenannte Natortalente jitt, die ehr Publikum jewaldich en ehre Bann trecke künne, dat kunnt mer am Sambsdaach bei der Premier vum Kumede-Thiater sinn. Do joven se e löstich Stöckelche em schönste un reinste Kölsch un nit en enjekölschtem Huhdütsch. Ich weiß nit, ov vun denne einer jemols en Schauspillschull vun enne jesinn hät, ävver et wor eifach jroßaatich. Eijentlich hann ich et jo all verstande, wat do leef, bloß eins ess mer nit klor woode, nämlich dat dat Dinge rappelvoll wor. Erfahrungsjemöß weed dat en de nöhkste üvver 20 Vörstellunge jenau esu sin. Un dat, wo de Kölsche doch kei Woot Kölsch mih verstonn künne. Juxisch, ne? Meint ehr nit och? Kölnische Rundschau vom 21.10.11