Toni Buhz

Tauche…?!

Endlich wor et suwick. Et Fröhjohr wor total en de Botz jejange. Der Mai völlig verrähnt. Jetz em Juni ävver dät de Sonn schinge, als ov se et widder jot maache woll.
Der Hein un singe Fründ Schäng hatten sich dröm am Wochenengk opjemaat un wollten sich em Müngersorfer Schwemmbad ne schöne Daach maache.

Wie se sich no su em Wasser verjnöchten, fing der Hein op ens hell aan zo laache.
Natürlich wollt singe Fründ wesse, wat im dann su plötzlich durch der Kopp jejange wör.
„Och,“ meinten der Hein, „mer ess do e Krätzche widder enjefalle. Pass op, ich verzäll et dir.“ Dann laht hä loss:

Vörm Kreech kunnt mer em Hohenstaufenbad, am Ring, wie en andere Hallenbäder et Schwemme liehre. En dem Bad dät och der Kardinal Frings jede Morge sing Ründche driehe. Dä kunnt schwemme. Andere ävver, die et jän im jlich jedonn hätte, kome beim Bademeister, hä heeß Hein Domjörgen, aan de Angel. Zovör hatten se ne Jödel öm et Liev jeschnall kräge, wo dä Hoke vun der Angel enhejok woode wor.
Eines Dachs no hatt hä widder ne Fetz am Hoke, doch dann dät hä ne Augenbleck ens nit oppasse und dä ärme Schwemmaspirant tauchte unger. Wie hä widder huh kom,reef hä: „Tauche. . . „. „No jo,“ daach der Hein, „wenn et im Freud määt“, un leet widder Kood no, un dä Fetz jing widder unger. Dat Spillch jingk su wigger. „Tauche. . .“ reef dä em Wasser, Kood leet dä aan der Angel no.
Bes et op einmal dem Schwemmmeister zovill wood un hä dä Jung üvver Wasser heelt. Un do kom et. Dä Stropp schnappten no Luff un reef dann: „Tauche. . . kann ich nit verdrage.“

Domet wor dat Krätzche am Engk. Dä Schäng laachten ens koot, hä kannt dat Verzällche vun fröher, hatt et ävver verjesse. Dann reef hä: „Tauche“ un singe Fründ setzten hingerdrop: „künne mer beidse verdrage“ und domet höppten se en´t Wasser un hatten noch ne verjöchten Daach.

 

Jebad

Letz sproch ne jode Fründ mich aan,
Wie dat passeeren deit,
Un fröch mich, wo e Deechterwoot
En welchem Rümche steiht.

Ich hatt et nit sujlich parat,
Dat hät jeärjert mich.
Su trot ich aan e Böcherschaaf
Fung aan ze söke jlich.

Jreff he e Boch un do en Schreff,
Wie et mer jrad feel en.
Bahl merkten ich, et wood nix drus,
Su jov dat keine Senn.

Ich nohm se dröm der Reih no rus,
Jov mich an´t Bläddere dran.
Et blevv nit us, ens he, ens do,
Fung ich zo lese aan.

Mänch Rümche, dat ich längs verjoß,
Dät widder ich entdecke.
Un wat ich kannt un mer jefeel,
Dät mer wie Taat jetz schmecke.

Am Ovend jov ich et dann op,
Dä Sproch wor nit ze finge.
Dem Fründ zo helfe, wie ich wollt,
Dat dät mer nit jelinge.

Zwor hatt ich mich ömsöns bemöht,
Hatt doch Pläseer jenoch.
Et wor, als hädden ich jebad
En unsrer kölschen Sproch.

 

Em Himmel

Ne Kölsche en der Himmel kom,
Worf fott dä Ädenaldachskrom,
Su wie der Petrus im jesaat.
Reef quietschverjnöch: „Jetz ess et Maat.“
Un zo nem Engel sproch hä dann:
„He kanns do minge Brassel han.
Nor drei Deil dörft ehr mer nit nemme,
Wenn ich jetz op mih Wölkche klemme:
Do wör zoehsch dat jot Jemöt,
Wie et dem Kölsche zojehööt.
Als zwettens dann dä fruhe Senn,
Dä stich en jedem Kölsche dren.
Un drittens ich nit messen kann,
Die Leev, die ich em Hätze han
Zo minger Stadt, zo mingem Kölle.
Dat dun janz vörren aan ich stelle.
Bliev dat, wääd ich räch jlöcklich sin,
Weil ich ne kölsche Engel ben.

Doch nemmt ehr fott mer die drei Saache,
Han ich em Himmel nix ze laache.
Dann maachen ich mich op de Söck,
Versöken anderswo mih Jlöck,
Wohin ne heiße Droht ich han.
Die Konkurrenz, die freut sich dann.

 

Et Bad

Dä Papp ess hück zum Wochenengk
Allein met singem Schäng.
De Mamm besök en kranke Tant,
Hä hät jet aan de Jäng.

Hä määt, wat et zo dun su jitt,
Spillt och met singem Fetz,
Wir dä am Ovend drecklig ess,
Bad hä in noch zoletz.

Un wie hä domet fädig ess,
Do hät hä stolz jesaat:
„No, kleine Stropp, wie wor et dann?
Han ich et jot jemaat?“

„Jo, röf dä Klein, „et hät jeklapp.
Ich maachen keine Schmuus.
Nor trick dem Mamm, wenn die mich bad,
Mer och de Schohn noch us.“

 

Su ess et Fröhjohr

Et Fröhjohr ess kumme,
Nit nor em Kalender.
Mer spööt et, steit mer
Om Balkön am Jeländer.

Ich meine, mer künnt et
Tirecktemang packe.
Ich kaufe neu Kleidcher,
Häng fott decke Jacke.

Freu mich op alles,
War ringsöm bahl blöht.
Et Fröhkohr ess kumme,
Un ich ben su mööd!

 

Su ben ich
(En klein Visittekaat)

Dä eine kann mole,
Ne andre kann schrieve.
Dä dritte löht beides
Us jodem Jrund blieve.
Vielleich deit dä singe,
Dat de Balke sich beje.
Un einer well immer
Et Wandere fläje.
Vill spille Foßball,
Dun Jeweechter stemme,
Schwemme un Tauche,
Huh Birch erop klemme.
Bei meer ess dat anders,
Ich hann minge Steff,
Ming kölsche Wöötcher.
Han de Sproch och em Jreff.
Et deit mich ärch freue,
Wenn alles räch flupp.
För mich esss dat Kölsche
Et Salz en der Zupp!