Heide Salentin

Der schlaue Aanstricher

ins Kölsche übertragen von Heide Salentin

Der Samsdagsmorge wor gekumme; de ganze sommerliche Welt wor frisch und ganz vun Levve voll. In jedem Hätze klung e Leedche, un wann et Hätz jung  wor, dann komen de Tön esugar  us der Schnüss. Op jedem Geseech log der Fruhsinn, un in jedem Schritt wor alääte Kraff.  De Robinie wore am Blöhe, un de Looch wor voll vun ehrem Döff.

Om Trottoir stundt dä Bätes met enem Emmer wieße Färv un enem Pinsel met enem lange Stil. Hä loten sich dä Zung an – op eimol hatt de Natur ehre Glanz verlore, un deefe Schwermod kom üvver in. Ene Zung: Dressig Meter lang un drei Meter huh!  Et Levve kom im leer und ledig vür un schungk im nix anders wie en Lass.

Met enem Kühm stoppten hä dä Pinsel en der Emmer un trok in üvver et övverschte Bredd.

Dat dät hä dann noch ens un noch ens, un dann dät hä sich dä kleine wieße Striefe Färv op däm sich lang hintreckende Kontinent vun ungestrichenem Zung anluure un satzte sich op ene Baumstamm.

Us dä große Pooz kom jetz dä Jupp mit enem Blechemmer en der Hand erusgehöpp un wor am Singe: „Am Eigelstein es Musik, am Eigelstein es Danz ….“

Bes jetz wor et för dä Bätes luuter en ganz fiese Arbeid gewäs, et Wasser vun der Pump holle ze gonn, ävver diesmol kom im dat üvverhaup nit esu schlemm vür.

Hä moht dodran denke, dat an der Pump luuter Minsche stundte un dat do och luuter jet loss wor.

Do stundte de Weechter un Fente un woren am Waade, bes se dran kome. Se däten sich jet reste un de Spillsaache ungerenander tuusche; se däten sich zänke,  sich verkamesöle und allerhand Dollereie maache.

Hä dachten dodran, dat dä Jupp, ovschüns die Pump bloß 150 Meter wigg fott wor, nie vür einer Stund met enem volle Emmer Wasser zoröck kom, un ganz off moht in esugar dann noch einer holle kumme.

 Dä Bätes saht för in: „Hür ens, Jupp, ich gonn dat Wasser för dich holle, wann do e beßge striche deis.“

Ävver dä dät nur mem Kopp schöddele un saht för in: „Dat geiht nit, Bätes. Die ahl Möhn, de Tant Tring, die hätt gesaht, ich soll Wasser holle gonn un nit stonn blieve un met keinem jet usdriehe. Se hätt mer extra verklört, wenn do mer sagen däts, dat ich der Zung striche soll, dann soll ich bloß maache, dat ich fottkumme .Ich sollt mich öm ming Saache kömmere –  öm dat Aanstriche dät sei sich kömmere.“

„Och, drieß doch jet drop, wat die Ahl gesaht hät, Jupp! Die schwaad doch luuter esu.  Dun mer ens der Emmer, ich ben bloß e Minüttche fott. Die weed dat doch nit gewahr!“

„Och, ich trau mich nit, Bätes. Bestemmp pack mich die Ahl un rieß mer der Kopp av. Dat deit die, ganz secher!“

„Die. Die verkamesölt doch keine. Vielleich gitt se enem en Knuuz mem Fingerhot. Un wenn, mäht dat jet us? mööch ich wesse. Se kann jo öntlich schänge, ävver Schänge deit doch nit wieh. – Jupp, ich gevven dir ene Ömmer. Ene wieße Ömmer us Glas kriss do.“

Dä Jupp wor och nur ene Minsch – un dat Dingelche dät im öntlich god gefalle. Hä stallte dä Emmer op de Ääd un nohm dä wieße Bomm in de Häng. 

Un  em  nökste Momang flog hä  met däm Emmer  un ener gekitzelte Fott de Stroß erav.

Dä Bätes heelt sich am Striche – wat gisste-wat hässte-, un de Tant Tring, met de Schluffe en der Hand, maht sich durch de Kood.

Däm Bätes sing Arbeitsloss heelt sich ävver nit mieh lang. Et feelen im all die löstige Sache en, die hä hügg noch vürhatt, un hä woodt immer nixnötziger. Hä stallt sich vür, wie glich all die Pooschte , die frei hatte, hee vorbeigetirvelt kome un wie se in uslaache däte, wann se sochen, wie hä hee am Arbeide wor – allein dat Denke  dodran brannt en em wie Füür.

Hä nohm sich singe weltliche Besetz un dät en sich beluure: Kappoddige Spillsaache ,Ömmer un allerhand Krom. Genog, för e beßge Arbeid ze tuusche, ävver mit genog, sich för en halv Stund richtige Freiheit zo kaufe. Su stoppten hä all sing Meddelcher widder in sing Täsch un gov et dran, sich zo üvverläge, wie hä die Fante kaufe kunnt.

In däm Momang kom im en Idee. Hä nohm dä Pinsel widder en de Hand un gov sich still an sing Arbeid. Koot drop leet sich dä Tünn blecke, genau dä, vun däm singer Grielächerei hä de mietste Kadangs hatt.

Däm Tünn singe Schrett wor en einzig Höppe, Danze un Springe, un mer kunnt richtig sinn, dat im et Hätz vür Freud üvverging. Hä wor grad ene Appel am Käue, un zweschendren dät hä laut tröte, denn hä wor e Scheff, hä stallte quasi ene Dampfer vür, dä Große Rüdesheimer.

Dä Bätes heelt sich am Aanstriche un dät sich nit öm dä Dampfer kömmere.

Dä Tünn luurten in ene Augenbleck lang an un saht dann för in: „He, do bes ävver en de Bredouille, wat?“

Et kom kein Antwort. Met däm Aug vun enem Künsler dät sich dä Bätes singe letzte Pinselstrich beluure, dann gingk hä noch ens met enem leichte Fupp drüvver un dät sich dat Ergebnis noch ens anluure. Dä Tünn stallt sich nevven in. Wie dä Bätes dä Appel soch, leef im et Wasser im Muul zosamme, ävver hä bleev bei singer Arbeid. Do saht dä Tünn: „Ah do, muss do arbeide, wat?“

„Och, do bes et, Tünn. Han ich gar nit gemerk.“

„Ich gonn schwemme, hörs de? Wills de nit metkumme?- Nä, ne, do wills leever hee arbeide, ne?“

Dä Bätes dät sich dä Fant en Zigg lang anluure und frogten dann: „Wat nenns do dann Arbeid?“

 „Jo, es dat dann vielleich kein Arbeid?“

Dä Bätes gov sich wigger an et Striche un meinten dann ganz drügg: „No jo, vielleich och nit. Ich weiß nur eins: Mir gefällt et.“

„Och, hür op, do wills mir doch nit verzälle, dat dir dat Freud mäht?“

Der Pinsel wor wigger am Striche.

„Ov mir dat Freud mäht? Jo, ich wöss nit, woröm nit. Kritt mer vielleicht alle Dags die Gelägenheit, ene Zung zo striche?“

Jetz schungk die Angelägenheit in enem neue Leech. Dä Tünn hoot op, an singem Appel zo käue. Dä Bätes strich dä Pinsel met Aki hin un widder – dann gingk hä e Stöck zoröck för ze luure, wie dat ussoch, maht hee un do noch e klein Pünkelche Färv dobei, dät sich dat Ganze widder beluure, und dä Tünn wor in de ganze Zigg am Beäuge, und die ganze Saach dät in öntlich interessere.  Bes hä noh ener Wiel sagen dät: „Bätes, jetz loss mich och e beßge striche!“

Dä Bätes wor drop un dran, ´jo´ zo sage, dät et sich dann ävver noch ens üvverläge.

– „Nä, nä, dat geiht jetz nit. Luur, de Tant Tring, die ahl Möhn, nimmp et nämlich ärg genau met däm Zung hee. Dä steit jo tireck an der Stroß; wann dä hinge wör, dät et mir jo nit esu drop ankumme, un ehr och nit. Jo, ärg genau deit se dat met  däm Zung he nemme. Do muß mer ganz akkurat striche. Ich gläuv, kaum einer vun dausend Fente kann et esu maache, wie et sich gehööt, vielleich nit ens einer vun zweidausend.“

„Meins de?“

„Jo.“

 „Och, maach ens! Loss et mich doch ens bloß versöke, bloß e klei beßge! An dinger Stell dät ich dich losse, Bätes!“

„Tünn, ich dät dat jo gään, ävver de Tant Tring – weiß de, der Jupp wollt et och ald dun, ävver se hätt in nit gelooße. Sühs do dann nit, wie ich en der Bredouille  ben, Tünn? – Wenn do dich do dran mähs un et passeet jet domet….“

„Och, Blödsinn. Ich maach et genau esu vürsichtig wie do. Kumm, loss mich et ens versöke. Ich gevven dir e Stöckelche vun  mingem Appel, jo?“

„No jo,  –  och, Tünn. Leever nit, ich han esu en Kadangs.“

„Ich losse dir dä ganze!“

Dä Bätes gov im dä Pinsel voll Widderwille im Geseech, ävver voll Freud im Hätze.

 Un wie dat vürmolige Dampfscheff Großer Rüdesheimer en der Sonn am Arbeide un Schweißte wor, dät sich dä pangsjuneete Künsler nevven im en der Schatte op e Faß setze, wippte met de Bein, verdröckte der Appel un dät sich üvverläge , wie hä noch e paar mieh unschöldige Fante veräppele kunnt.

Zeug hatt hä genog. – Un op eimol kome luuter Fante lans des Wägs. Se kome för sich löstig zo maache un se blevve för ze wieße.

Wie dä Tünn nit mieh kunnt, hatt dä Bätes de nökste Gelägenheit för wigger zo maache, ald för ene ahle  Pattevugel mem  Fischers Will getuusch, un wie dä sich ens stippe moht, dät sich der Müllers Schäng met ener dude Ratt enkaufe, die mer am Köödche erömschwenke kunnt.

Un esu ging et wigger, Stund für Stund. Un wie der Nommendag ald halv  vörbei wor, do wor us däm ärme Jung Bätes vum Vürmeddag ene junge Kääl  gewode, der nit woss wohin mit singer Richtümer.

Jetz hatt hä zwölf Ömmere, e Stöckelche vun ener Mundharmonika, en Scherv vun ener Fläsch us Glas, wo mer durchluure kunnt, ene Revolver, ene Schlössel, met däm mer  kei Schloß opkritt, ene Glasstoppe för en Karaff, ene Zaldat us Zinn, zwei Kaulquappe, e Kätzche  met einem Aug, en Klink us Messing un en Hungksling, ävver keine Hungk.

De ganze Zigg üvver hatt hä genöglich gefulenz un vill Lück öm sich eröm gehatt ,  un der Zung wor jetz bedeck –  met einem dreifache Aanstrich!

 

Ins Kölsche übertragen von Heide Salentin aus:

Mark Twain (1835-1910):   

Die Abenteuer des Tom Sawyer und Huckleberry Finn

 

aläät

Flink, munter, aufgeweckt

Looch

Luft

Trottoir

Bürgersteig

Zung

Zaun

Met enem Kühm

Mit einem Seufzer

Pooz

Pforte, Tor

Luuter

Immer

Weech

Veralt.: Mädchen

Fant

Veralt.: Junge

Verkamesöle

Verprügeln

Ovschüns

Obschon, obwohl

Esugar

Sogar

Verklöre

Erklären

Jet gewahr weede

Etwas erfahren

Knnuz

Hier: Stoß, Schlag, Puff mit der Faust

Schänge

Schimpfen

Ömmer

Murmel, Klicker

Bomm

Dicke Kugel; sehr dicker, kugelartiger Klicker aus Eisen oder Stein

Schluffe

Pantoffeln

Sich durch de Kood maache

Fortrennen, abhauen

Poosch

Bursche, junger Mann, Knirps

Grielächer

Verschmitzt lächelnder Spötter

Kadangs

Angst

Drügg

Trocken

Met Aki

Mit Geschick, Schwung

En der Bredouille sin

In Bedrängnis sein

Lans des Wägs

Den Weg entlang

Pattevugel

Papierdrachen

Schäng

Johannes, Hans

Zaldat

Soldat

Genpglich

Genügsam

Sich stippe

Sich stützen

Hungksling

Hundeleine